Ortada İranla yeni diplomatik müharibə yarada biləcək ittihamlar dolaşır
Bir neçə gün öncə islamçıların həbsi ilə bağlı Milli Təhlükəsizlik Nazirliyi və Baş Prokurorluğun verdiyi birgə məlumatda bir məqam xüsusi diqqət çəkir. Düzdür, həbs olunan şəxslər əvvəllər də Iranla əməkdaşlıqda ittiham olunsalar da, bu dəfə rəsmi Tehrana qarşı konkret ittihamlar irəli sürülüb. Belə ki, saxlanılanlardan Abgül Süleymanov Iran Islam Respublikasının Bakıda fəaliyyət göstərən Mədəniyyət Mərkəzindən maliyyə dəstəyi alaraq “Cəfəri” adlı radikal dini qrup yaratmaqda ittiham olunur.
Maraqlıdır ki, bundan əvvəl Irana qarşı bu cür ittiham irəli sürülməmişdi. Əldə etdiyimiz bəzi məlumatlara görə, hakimiyyət bir müddət əvvəl Iran Mədəniyyət Mərkəzinin Bakı nümayəndəliyinin rəhbəri Ocaq Necatı həbs etmək istəyirmiş. Amma sonradan O.Necatın Iranda din xadimi kimi böyük nüfuza sahib olması hakimiyyəti bu fikirdən daşındırıb. Lakin son günlər Iranla yaşanan gərginlik bu həbsi yenidən gündəmə gətirib.
Onu da qeyd edək ki, vaxtilə Azərbaycan Türkiyə ilə ölkəmizdə səfir işləmiş Altın Karamanoğluya görə bu tip diplomatik qalmaqal yaşamışdı. Indi isə analoji halın Iranla bağlı təkrarlanacağı istisna edilmir.
Bəs görəsən, Mədəniyyət Mərkəzinin Bakı nümayəndəliyinin rəhbərinin həbsi nə dərəcədə mümkündür?
Politoloq Zərdüşt Əlizadənin sözlərinə görə, MTN və Baş Prokurorluğun Iran Mədəniyyət Mərkəzinə və onun rəhbərinə qarşı irəli sürdüyü ittihamlar inandırıcı deyil. Irəli sürülən ittihamlarda hüquq-mühafizə orqanlarının ənənəvi absurda yol verdiyini düşünən Z.Əlizadə vurğuladı ki, “Cəfəri” heç bir qeyri-qanuni fəaliyyətlə məşğul olmayıb: “Cəfəri” qonşu Iran dövlətinin rəsmi ideologiyası haqqında ədəbiyyatın yayılması ilə məşğul olub. Burada isə heç bir terror əməli yoxdur. Bu üzdən düşünmürəm ki, Irana qarşı irəli sürülən bu ittihamlar ciddi beynəlxalq qalmaqala səbəb olsun. Çünki dünya Azərbaycandakı vəziyyəti çox gözəl bilir. Dünya ictimaiyyəti bilir ki, Azərbaycanda öz xalqına zülm edən bir hakimiyyət mövcuddur. Azərbaycan bir bataqlıqdır”.
Mədəniyyət Mərkəzinin rəhbəri O.Necatın həbs olunmasının nə dərəcədə real olacağına gəlincə isə Z.Əlizadə hadisələrin bu cür gedişinə inanmır. “Əgər belə bir addım ata bilirlərsə, buyursunlar”,- deyə Z.Əlizadə vurğuladı.
"Ocaq Necatın həbsi İranın sərt reaksiyasına səbəb olar"
Təhlükəsizlik məsələləri üzrə ekspert Sülhəddin Əkbərin fikrincə, Iran Mədəniyyət Mərkəzinin adının bu kontekstdə hallandırılması təsadüfi deyil. Hələ 90-ci illərdən mərkəzin fəaliyyətinin Azərbaycanın xüsusi xidmət orqanlarının diqqətini cəlb etdiyini deyən S.Əkbər vurğuladı ki, mərkəz heç də elan etdiyi prinsiplərə uyğun fəaliyyət göstərmir: “Iranın Mədəniyyət Mərkəzi əgər bir tərəfdən Islam dini ilə bağlı ideologiyanı təbliğ edirsə, digər tərəfdən Azərbaycanda Iran tipli bir dövlətin yaradılması təbliğatını da aparır. Bu istiqamətdə müxtəlif insanları ələ alır, onlarla iş birliyinə girir. Ona görə mərkəz barəsində bu cür sərt rəsmi mövqenin bildirilməsinə təəccüblənmədim”.
O.Necatın həbs olunmasına gəlincə, S.Əkbərin də fikrincə, Azərbaycan bu məsələdə çox dərinə getməyəcək. S.Əkbərin sözlərinə görə, O.Necat Iranın dini rəhbərliyinin təmsilçisi olduğundan Azərbaycan diplomatik qalmaqal istəməz. Çünki bu şəxsin həbsi Iranın sərt reaksiyasına səbəb ola bilər.
Hökumət politoloqundan Ocaq Necata təhqiramiz ifadələr
Bu arada hakimiyyətə yaxınlığı şübhə doğurmayan politoloq Mübariz Əhmədoğlu Ocaq Necata qarşı ağır ittihamlar səsləndirib. M.Əhmədoğlu deyib ki (APA), Ocaq Necatın 20 ilə yaxın fəaliyyəti dövründə Iran-Azərbaycan münasibətlərində müsbət heç bir şey baş verməyib. “Iran-Azərbaycan sərhədində narkotik axını o səviyyədədir ki, bunu birmənalı şəkildə Iran-Azərbaycan münasibətləri üçün Iranın müəyyənləşdirdiyi gerb və ya rəmz kimi başa düşmək olar. Iran sərhədçiləri Azərbaycana keçirilən narkotik maddələrin qarşısını almırlar. Özlərini hər şeyə qadir hesab edən Iran hərbçilərinin narkotikanın qabağında “qüdrətləri” sınırsa, bunu da təsadüfi hesab etmək lazım deyil”.
Politoloq deyib ki, Əhəd Qəzaidən sonrakı bütün səfirlər Ocaq Necat tərəfindən idarə olunub. Ona görə səfirlik bir lazımsız quruma çevrilib:"Islam Partiyası oyuncaq quruma çevrilib. Islam Partiyasına son vaxtlar yalnız zombiləşdirilmiş adamlar rəhbərlik ediblər. Partiyanın yuxarı eşelonunda normal dünyagörüşünə malik, diniliklə dünyəviliyi birləşdirməyi bacaran adamların olmasına baxmayaraq, Ocaq Necat yalnız zombilərin rəhbərliyə çıxmasına icazə verib. Rəftar prinsipləri “Ağlım Ocaq Necatın cibindədir” olan şəxslərin fəaliyyəti nəticəsində bu gün islamçıların böyük əksəriyyəti həbsxanadadır”.
Politoloqun fikricə, Iranda din siyasətin nökərinə çevrilib. Məscidi Ramazan ayında topla dağıdan, islami partiyaların fəaliyyətini qadağan edən, qadınları hicabsız gəzən Suriyanı Iran hər vasitə ilə müdafiə edir. Bundan xeyli yumşaq parametrli Azərbaycanı isə, az qala məhv etməyə hazırlaşır: “Ocaq Necat Azərbaycanda fəaliyyətə başladığı dövrdə Iran Azərbaycanın birinci və ya ikinci ticarət ortağı idi. Indi 10-cu tərəfdaşıdır. Ocaq Necatın fəaliyyəti dövründə Azərbaycanda onların təsiri altında olan adamlar arasında dini mədəniyyət pisliyə doğru transformasiya olunur”.
Hökumətyönlü politoloq Iranın spikeri Əli Laricaninin Bakıya səfərini Bakıda və Gəncədə Ocaq Necatın arxasında namaz qılmasını sərt tənqid edib:"Bu namazın ictimai nümayişini yada salmaq istəyirəm. Vaxtilə Ərdəbilin dağ-dərəsində at-eşşək dalında dayanan, otaran Ocaq Necatın arxasında indi Əli Laricani kimi vəzifəli şəxs, akademiklər, professorlar namaz qılır. Onun bu keçmişi və DAK-dakı ərdəbillilərin buna bənzər məlumatlara malik olması, görünür, Ocaq Necatda kompleks yaradıb, amma gecdir. Ocaq Necatın arxasında namaz qılan akademik, professor, özünü abırlı bilən savadlılar müəyyən qədər bu məsələdən məlumatlıdırlar. Bu məlumatlanma DAK-dakı ərdəbillilərin DAK-da qalıb-qalmamasından asılı olmayaraq davam edəcəkdir. Görünür, Ocaq Necat reallaşdırmağa cəhd etdiyi inqilabın başlanğıcında Əjdər Tağızadənin mətbuata çıxıb onun keçmişindəki belə hadisələrdən danışmağa başlamasından ehtiyatlanır”.
